Steffan Lloyd Owen

Daw’r bariton Cymreig ifanc, Steffan Lloyd Owen o Bentre Berw ar Ynys Môn yng Ngogledd Cymru. Wedi derbyn hyfforddiant cychwynnol gan Siân Wyn Gibson, mae Steffan bellach wedi cwblhau cwrs B.Mus. Astudiaethau Llais yn y Royal Northern College of Music ym Manceinion, dan hyfforddiant Nicholas Powell.  Yn ystod ei flwyddyn gyntaf, enillodd Steffan wobr Goffa Elsie Thurston, ac yn ddiweddarach, dewiswyd ef i gynrychioli’r RNCM yng Ngwobrau Kathleen Ferrier yn Blackburn, lle, ar ôl cystadleuaeth ffyrnig yn erbyn 15 o fyfyrwyr eraill o brifysgolion a chonservatoires ar hyd a lled Prydain, dyfarnwyd Steffan y safle cyntaf – yr ail fyfyriwr o’r RNCM i’w hennill erioed.

Mae llais cyfoethog, hyfryd Steffan wedi ennill gwobrau lleisiol mawr yng Nghymru, yn benodol Ysgoloriaeth W. Towyn Roberts, a Gwobr Goffa Rhuban Glas Osborne Roberts yn Eisteddfod Genedlaethol Cymru ac Ysgoloriaeth am unawdydd mwyaf addawol Eisteddfod yr Urdd. Fel rhan o wobr Ysgoloriaeth Osborne Roberts, bu Steffan yn perfformio fel unawdydd yng Ngŵyl Gymreig Gogledd America yn Efrog Newydd yn Awst 2017. Ymwelodd Steffan a Phatagonia yn 2014 gyda’r Urdd, ac enillodd ef y Brif Unawd yn Eisteddfod Genedlaethol Patagonia.

Mae ei uchafbwyntiau cyngerdd diweddar yn cynnwys Mozart Requiem gyda’r Orchestre National de Bretagne yn Rennes dan arweiniad Grant Llewelyn ac Offeren yn C Beethoven a Choral Fantasy fel rhan o gyngerdd arbennig gyda Cherddorfa a Chorws Cenedlaethol Cymreig y BBC a Cherddorfa Opera Cenedlaethol Cymru, i ail greu cyngerdd hanesyddol elusennol a roddwyd gan Beethoven yn Fienna ym 1808.

Mae ei berfformiadau opera diweddar yn cynnwys rôl y Brenin yn y perfformiad cyntaf o’r opera newydd i blant Cyfrinach y Brenin a gyfansoddwyd gan Mared Emlyn. Bydd Steffan yn dychwelyd i Opra Cymru'r tymor hwn i wneud ei ddébut fel Guglielmo yn Cosi Fan Tutte. Yn haf 2019, perfformiodd Steffan y brif ran yn yr opera i blant, Brundibar gan y cyfansoddwr Tsiec Hans Krása gydag Opera Ieuenctid Cenedlaethol Cymru. Mae ei rolau diweddar eraill yn cynnwys Lord Hate-Good yn Pilgrim’s Progress gan Vaughan Williams a’r cyfreithiwr, Ser Amantio Di Nicolao yn Gianni Schicci yn yr RNCM. Yn 2017, perfformiodd rannau Sciiarrone a Jailer mewn cynhyrchiad wedi ei led-lwyfannu o Tosca ochr yn ochr â Syr Bryn Terfel a Kristine Opolais gyda Cherddorfa Opera Cenedlaethol Cymru yn Eisteddfod Gerddorol Ryngwladol Llangollen. Mae ei rannau eraill yn cynnwys Zaretsky yn Eugene Onegin ac El Dancairo yn Carmen, ill dau yn addasiadau Cymraeg talfyredig i Opra Cymru a George Jones yn Street Scene yn yr RNCM.

Opera

Brundibár

Brundibár

The Pilgrim's Progress

The Pilgrim's Progress

Tosca

Tosca

Concerts & Recitals